Haghi Ghayo Keduo

Haghi Ghayo Keduo, dimulokan dongan drama den mongamuk soghang2 kek ghumah sobab kopi dah habih. Den pun bueklah teh uncang, tapi efeknyo tak samo sobab den tak boliah monyanyi "ko ko ko kopi!" maso sarapan.

Lopeh tu, den bobaghing2 tengok tiwi cam ular sawo sementagho monunggu abang den bangun. Den dah bajet dah abang den mosti bangun lambek punyo, sobab malam tadi dio baliak puku ompek sotongah pagi (den ghaso, 'punch card' kek ghumah tu memang limit dio sampai pukul 430pagi, sobab malam semalam pun dio baliak 'time' tu juo).

Abang den bangun maso tongahari, itupon sobab den tondang pintu bilik dio 40 kali. Lopeh dio mandi, kami pun botolak ko Kualo Pilah. Tahun ni potamo kali kami baliak tanpo ayah, sobab ayah den boghayo kek Medan umah bini dio.

Sampai kek Bukit Putus, tibo-tibo jalan 'jam' pulak. Eden ngan abang den golak sampai gigil, sobab Bukit Putus mano ponah 'jam'. Lopeh tu sodaro kami kek Pilah tipon, katonyo ado kemalangan kek Tanjung Ipoh, sobab tu jalan 'jam'.

Bosan bona monghaghung jalan yang 'jam' di Bukit Putus, apo laie bilo abang den punyo 'CD collection' adalah sangat kodi. 'Club remix' la, Peterpan la, sampai kek Ulu Bendul, den raso den botul2 bondul.

Setibonyo kek Pilah, kami poie ko kubur dulu. Menziarah kubur atok den. Menziarah kubur uwan den. Menziarah kubur omak den.

Lopeh tu, kami botolak ko ghumah Pak Lang. Ghumah Pak Lang ni sobolah rumah uwan jo. Sampai kek sano, macam biaso kami torus makan. Rondang ayam, rondang dagiang, lomang, tempoyak pucuk. Poncuci mulut, macam biaso, ialah tapai.

Kali ni, kami botandang lamo sikit, sobab malam nanti nak menziarah rumah Induk Sukar pulak. Jadi eden habiskan maso bergossip dongan Pak Lang den. Corito pasal atok, wan, API, AWAS, sampailah ko Bagan Pinang.

Abang den cubo nak menghasut, "Pak Lang boliah tak tolong nasihatkan dio ni, asyik kono tahan jo". Tapi Pak Lang den kato, "biarlah dio bojuang, namanyo pun cucu atok dio" ditambah pulak dongan Mak Lang den "kami kek sini bobanggo dongan kojo2 kamu tu. Toruihkan" (hehehehe silap laa abang oi ni kan territory gua :p)

Lopeh tu, kami bojalan2 kek kampung tu dan boronti minum kopi. Malam lopeh maghrib, kami botolak ko ghumah Induk Sukar (induk=makcik). Ghumah Induk ado nasi minyak. Makan laie.

Eden raso sogan sikit dongan diri sendiri, sobab ado namo sodaro yang eden tak ingat. Tahun ni, eden socaro rasminya dikonali sobagai Induk Ti @ Nok Ti sobab ado sepupu den yang dah beranak. Kato Kak Cik, memang kono bonarlah tu... Nok Ti yang 'naughty' hahahah.

Maso kami botolak pulang, haghi dah golap bona. Tapi abang kasanova den nak juo baliak ko KL, ada 'hal' katanyo. Tak kisahlah tu. Tapi bawo kereto cam pelesit sakit poghut tu yang den hangin tu. Akhirnya kami tibo juo... dan eden ditinggalkan laie, mungkin sampai puku 430 pagi laie.

Sobonanyo den gombigho gak dio takdo ni ha, sobab boleh la den melantak tempoyak pucuk samo rondang daging dan rondang ayam yang ditapau dek Mak Lang ni sampai habih, den ingatkan nak tinggalkan sopiring jo kek dio sebagai tando protes. Padan muko.

Selamat Haghi Ghayo semuo.

Rumah wan den yang sodang di'renovate' oleh Pak Long den


Farah bosamo induk-induknyo